आचार्य रामानंद मंडल
जाति बनाम जातिवाद/ धरम संकट मुक्त
१
जाति बनाम जातिवाद
बिहार जाति आधारित गणना (The Bihar caste base Survey) पर उच्च न्यायालय, पटना तत्काल प्रभाव से रोक लगा देलक हय।कुछ लोग अइ आधार पर याचिका दायर कैले रहल हय कि अइसे जातीय विषमता बढत आ दोसर इ कि जनगणना कराबे के अधिकारी केन्द्र सरकार हय।जौकि बिहार सरकार के कहना हय कि इ जनगणना न हय बल्कि एकटा सर्वे हय।आ सर्वे करे के अधिकारी राज्य सरकार होइ हय।
पहिले उच्च न्यायालय गणना पर रोक लगाबे सं इंकार क देले रहय।तब याचिका कर्ता सर्वोच्च न्यायालय मे गेल। सर्वोच्च न्यायालय याचिका कर्ता के उच्च न्यायालय मे जाय के आदेश देइत उच्च न्यायालय के आदेश देलन कि तीन दिन के अंदर अंतरिम फैसला करय।तैय आदेश के आलोक में उच्च न्यायालय अप्पन अंतरिम आदेश मे जाति गत गणना जुलाई -२३तक रोक लगा देलक।अगला सुनवाई जुलाई में निर्धारित हय।
राज्य सरकार के कहना हय कि लोक कल्याणकारी योजना के लेल सांख्यिकी के आवश्यकता होइ हय। केते बार न्यायालयो एकर जानकारी मांगै छय।एकरा अभाव मे जन कल्याणकारी योजना के लागू करे मे व्यवधान होइ हय।
मंडल आयोग के लागू करे मे दिक्कत भेल रहय।वोइ समय मे १९३१मे भेल रहय जाति गणना के डाटा के आधार पर पिछड़ा वर्ग के २७प्रतिशत आरक्षण शिक्षा आ सेवा क्षेत्र मे देल गेलय। अनुसूचित जाति आ अनुसूचित जन जाति के जनगणना करे के प्रावधान संविधान में हय। लेकिन सामान्य वर्ग आ पिछड़ा वर्ग के जाति गणना के प्रावधान न हय।त जाति गणना के लेल जनकल्याण के लेल संविधान संशोधन करनाइ आवश्यक होइ जाय छैय। सामान्य वर्ग के बिना जाति गत डाटा के आर्थिक आधार पर १० प्रतिशत आर्थिक आधार पर आरक्षण भेंट गेल।जौकि संविधान मे आर्थिक आधार पर आरक्षण देवे के प्रावधान न हय। संविधान मे केवल सामाजिक आ शैक्षणिक पिछड़ापन के आधार पर शिक्षा आ सेवा क्षेत्र मे आरक्षण देवय के प्रावधान हय।
जौं समाज मे जाति हय त जाति के गणना आवश्यकता हय। तबे वोकर कल्याण के लेल आनुपातिक योजना बनायल जा सकल हय। हर जगह धर्म आ जाति के कालम भरल जाइ हय। लेकिन जौ गिनती के बात होइ हय त एकर अल्पसंख्यक जाति एकर विरोध करय हय।असल मे गणना के प्रजातंत्र में महत्व होइ हय आ वोइ गिनती से घबराइ हय। लोग अप्पन रोटी-बेटी के संबंध अप्पन जाति मे करय हय।हर जाति के अप्पन कल्चर हय। हर जाति के संघ -संघठन हय। संगठन त अंतरराष्ट्रीय स्तर तक बनऐलय हय।जातिवाद खूब करत परंतु जाति से घबरायत।कहत कि सामाजिक समरसता हय।आइयो समाज मे जातीय विभाजन आ विमषता हय। जातिगत विषमता बनल रहय अइ लेल जाति आधारित सर्वे के विरोध कैल जा रहल हय। माननीय उच्च न्यायालय के सभ तथ्य पर विचार करे के आवश्यकता हय।असल मे इ जाति बनाम जातिवाद के लड़ाई हय।
२
धरम संकट मुक्त
राजेश्वर प्रताप प्रतापगढ़ के पूर्व जमींदार रहलन।हुनका तीन सैय बिघा जमीन रहे।लम्बा चौड़ा दूमंजिला हबेली।दूरा पर दू गो हाथी,दूगो घोड़ा,दस जोड़ा बैल,चार गो भैसी आ चार गो गाय रहे।तहिना नौकर नौकरानी ,टहलू-टहलनी, गोबर कढनी रहे।हर जोते के लेल हरबाह, माल जाल के देखभाल लेल नौकर,खेती करे लेल मजदूर-मजदूरिन आ जेठरैयत रहे।केस मुकदमा देखे लेल मैनेजर। हाथी के लेल महावत,घोड़ा के लेल सहसवान, फिटिंग गाड़ी के लेल कोचवान, बैलगाड़ी के लेल बहलबान आ एगो जीप के लेल ड्राइवर रहे।
पच्चीस बरख के राजेश्वर प्रताप शादी सुदा रहे।घरबाली मृनालिनी भी रामगढ़ के जमींदार सूर्य प्रताप के एकलौती बेटी रहे। बाइस बरस के मृनालिनी पांचवां तक पढल रहे। साढे पांच फीट ,नाक नक्श आ शरीर के कटिंग ठीक रहे। लेकिन रंग से मद्धिम रहे।माने कि श्यामला रहे। स्नातक राजेश्वर प्रताप अपने गोर भुराक आ लगभग छह फीट के बांका जवान रहे।करिया मुंछ हुनका जवानी में चार चांद लगाबे।दूनू अपन जबानी में गोंता लगबैत पारिवारिक जीवन जीयत रहे।
एक दिन राजेश्वर प्रताप के नजर अपन गोबर कढनी दलित बिधबा कोसलिया के एकलौती बेटी रनिया पर परल।रनिया वोइ दिन अपना बिमार मतारी के बदले गोबर काढे आयल रहे। रनिया खूब सुन्नर रहे।अठारह बरस के रनिया के देखते राजेश्वर प्रताप के ठकमूर्गी लाग गेल।माने कि देखते रह गेल। कनिका देर के बाद राजेश्वर प्रताप बोललन-तू त कोसलिया के बटी छे न। रनिया बोललक-जी। राजेश्वर प्रताप बोललन-बहुत दिन के बाद देखलिउ हए। कंहा रहैत रहलैय हए । रनिया बोललक-हम अपना मामा इंहा रहैत रहली हए हमर नानी बिमार रहैत रहल हए।नानी के सेवा लेल मामा बुला ले रहल हए आबि हमर नानी मर गेल।तैइला आबि हम इंहे रहब। आइ हमरा माय के बुखार लागल हए तैइला काम करे हमही आ गेली हए।
इ बात सुनके राजेश्वर प्रताप कहलन-हं।माय के आराम करे दे आ काम करे तू ही आ।आ राजेश्वर प्रताप माल जाल के घर देखैत हवेली के ओर चल गेलन।
राजेश्वर प्रताप हबेली में त चल अयलन।
लेकिन मन मालजाल के घर में रह गेल।दिल रनिया मे अटक गेल। राजेश्वर प्रताप के रात के नीन उड़ गेल।रात में एक बार राजेश्वर प्रताप के मृनालिनी बोललक-कि बात आइ नीन न अबैय कि।
राजेश्वर प्रताप आंख मुलने कहलन-कोनो बात न।नीन आ रहल हए कहके पहिले बार झूठ बोललन।
राजेश्वर प्रताप केहुना क के रात बितैलन।माने कि रनिया के इंतजार करैत रहलन।
रनिया गोबर काढे सात बजे सुबह में आयल।उ रहरी के खरहरा से मालजाल के घर खहरैत रहे। राजेश्वर प्रताप भी मालजाल के घर के मुयैना करे के बहाने आ गेलन। रनिया थोड़ा सकपकायल।फेर रनिया अपना ओढ़नी के समाहर लक जे हरबरायला के कारन नीचा गिर गेल रहे।
राजेश्वर प्रताप बोललन-माय के कि हालत हौउ। बुखार कम भेलैइ कि न। रनिया बोललक-न। अभी हाथ-मथा बरा तपत हए। राधा किसुन डागडर के दबा चलै हए। राजेश्वर प्रताप बोललन-अच्छे इ ले एक सैय रूपया आ माय के दे दिहे आ कहिये मालिक दबाइ ला देलथुन हए।
रनिया घरे गेल आ माय के एक सैय रुपया देलक आ कहलक कि मालिक दबाइ ला देलथुन हए कौसलिया बोललक-मालिक के हमरा सभ पर धियान रहै छैय।
रनिया नित दिन काम करे आबे लागल। राजेश्वर प्रताप भी नित दिन रनिया से मिले लागल। कहियो रनिया के देर हो जाय त राजेश्वर प्रताप ब्याकुल हो जाय। कहियो राजेश्वर प्रताप के देर हो जाय त रनिया ब्याकुल हो जाय।माने के ब्याकुलता दोनों ओर रहे। माने कि इ प्रेम के आहट रहे।राजेश्वर प्रताप भी हबेली के ओर चल गेलन।
रनिया काम के अपना घर चल गेल। रनिया अपना माय के कुछ न कहलक।फेर रनिया काम करे आयल। राजेश्वर प्रताप भी आ गेलन। राजेश्वर प्रताप पुछलन-माय के कि हाल चाल हौउ। रनिया कहलक-धीरे धीरे सुधार हो रहल हैय।
राजेश्वर प्रताप हबेली के ओर चल गेलन।आ रनिया अपना घरे।
रनिया फेर सबेरे काम करे आयल। राजेश्वर प्रताप भी आ गेलन। राजेश्वर प्रताप रनिया से वोकरा माय के हाल चाल पूछलन। रनिया बतैलक कि माय के हाल चाल ठीक हो रहल हए। रनिया के राजेश्वर प्रताप के सहानुभूति आ व्यग्रता प्रेम के ओर बढ़े लागल
तहिना राजेश्वर प्रताप के रनिया के सुन्दरता आकर्सित करे लगल आ व्यग्रता प्रेम के डोर में बांधे लागल।
एनी मृनालिनी राजेश्वर प्रताप के व्यवहार में आयल परिवर्तन के खोज मे रहे।पता न लागे। लेकिन एक रात में जब मृनालिनी पूछलक कि अंहा हमरा पहिले लेखा प्यार न करै छी त राजेश्वर प्रताप कहलन कि हमरा रनिया से प्रेम भ गेल हए। मृनालिनी कहलक-वैइ गोबर कढनी कोसलिया के बेटी रनिया से। राजेश्वर प्रताप कहलन-हं।वोकरा बिना हम न रह सकै छी। मृनालिनी कहलक- इ अंहा कि बात करै छी।वोइ गोबर कढनी के बेटी से अंहा विआह क के हबेली में रखबै।इ हम न होय देब।
संजोग इ भेल कि रनिया के मामा रनिया के बिआह बगल के गांव शिवहर में ठीक क देलक। रनिया बिआह के बिरोध न कर सकल। राजेश्वर प्रताप भी गुम रहगेल। तय समय पर रनिया के बिआह हो गेल। रनिया ससुरा चल गेल। जाति आ समाज के रिवाज के मुताबिक चार दिन बाद अपना नहिरा प्रतापगढ़ आ गेल।
कल्ह सबेरे फेर रनिये काम करे आयल। राजेश्वर प्रताप माल जाल के घर के देखे बहाने फेर आ गेलन। राजेश्वर प्रताप कहलन-तू आ गेला।हम त तोरा बिना न रहब। रनिया कहलक-हमहू अंहा बिना न रह सकै छी। लेकिन हम बिआह के बिरोध न कर पैली। राजेश्वर प्रताप कहलन-हमहु कुछ न कर पैली। रनिया आ राजेश्वर प्रताप के प्रेम परवान चढ़े लागल।
चार महीना के बाद रनिया के दूरागमन के दिन आयल। लेकिन रनिया दुरागमन के साफ नकार देलक।माय मामा के भी समझावे के कोई असर रनिया पर न भेल। रनिया आ राजेश्वर प्रताप के संबंध के उड़ैत खबर लरिका आ वोकरा बाप के मालूम भे गेल।उ रनिया के संबंध के तोड़ देलक। माने कि छोड़ा छोड़ी हो गेल।
ससुरा से रनिया के संबंध टूटे के खबर से रनिया आ राजेश्वर प्रताप खुब खुश भेल। लेकिन मृनालिनी कनिका चिंतित भेल। कारन कि जमींदार परिवार मे इ सभ होइत रहैय हए। राजेश्वर प्रताप से मृनालिनी बाजल-कि सुनै छिये। ससुरा से रनिया के संबंध टुट गेले हए। रनिया ससुरा जाय से इंकार कर देल कै हए। हमरा त अइमे अंहा के हाथ लगैय हए।अही सिखैले पढ़ैले होबै। राजेश्वर प्रताप हंसैत के कहलन-हम कैला सिखैबै-पढैबै।मृनालिनी बाजल-हंयो। जमींदार परिवार सभ मे एहिना होइत रहै हए। हमरो एगो विधवा काकी अपने नौकर से संबंध रखले छथिन। परिवार में सभ चुपचाप हए। इ एगो समझौता हइ ।हमहु अंहा से समझौता करै छी लेकिन अइ हबेली मे हम रनिया के न रहे देब।
राजेश्वर प्रताप कहलन-हमहु रनिया के अइ हबेली मे न लायब।अलगे रनिया के टोले मे मकान बना देबै आ लिव इन रिलेशनशिप में रहब।
अब राजेश्वर प्रताप रनिया के एगो मकान
बना देलक।आ रनिया के नाम से बिस बिघा जमीनो लिख देलक। रनिया के पति जगह रनिया के बाप के नाम आ पता प्रताप गढ लिखायल गेल। राजेश्वर प्रताप दूनू जगह में समय बिताबे लागल। रनिया के मायो परिस्थिति से समझौता कर लेलक। कुछ दिन बाद रनिया के माय चल बसल।समय पाके रनिया के एगो बेटा भेल।नाव धैलक मनोज कुमार आ मृनालिनी से एगो बेटी भेल। नाव रखलक माधबी। मनोज कुमार से माधबी छौह महीना छोट रहे।
मनोज आ माधबी जौरे जौरे पढे। मनोज के बाप के नाम रनिया के बिआहल पति के नाम लिखायल गेल। जाति भी पति के लिखायल गेल। दुनू गोरे जवान भे गेल। दुनू गोरे में प्रेम भी पनप गेल। माधबी भी ग्रैजुएट हो गेल। समय पाके आरक्षन लाभ से मनोज सिंचाई विभाग में इंजीनियर भे गेल।आबि मनोज आ माधबी बिआह करे के बात करे लागल। मनोज के मन मे एगो बदला के भी भाव रहे।अपना माय आ राजेश्वर प्रताप के संबंध के लेके।समाज के ताना वोकरा मन मे बदला लेबे के आग लगा देले रहे।
मनोज आ माधबी इ जाने कि हम आ माधबी दुनू दू जात के छी। अइसे बिआह में कोनो बाधा न होयत।
एगो रात में माधबी अपना माय के अपन आ मनोज के प्रेम संबंध के बारे में बतैलक।आ कहलक कि हम दूनू गोरे विआह करे चाहैत छी। मृनालिनी अपन माथा पकर लेलक। मृनालिनी कहलक कि हम तोरा बाबू जी से विचार क के बतैयबौउ।राते में सुतैत बेर मृनालिनी राजेश्वर प्रताप के माधबी के बारे में बतैलक। राजेश्वर प्रताप कहलन-इ विआह न हो सकै छैय।माधबी के माय रनिया न हैय लेकिन हम बाप छी आ मनोजो के बाप हम छियै। भले मृनालिनी ,तोहर जनमल मनोज न हौअ । हम मनोज के जैविक बाप छियै।माने कि माधबी आ मनोज के बाप हम छियै। मतलब मनोज माधबी के जैविक भाई हए। माने मनोज माधबी भाई -बहिन हए।माधबी आ मनोज में बिआह न हो सकै छैय। हिन्दू धर्म में इ वर्जित हए।दुनु दू जात के होके भी विआह न हो सकै हए।इ त बरका धरम संकट हए। इ सभ बात राते मे मृनालिनी माधबी के कोठरी मे आके बतैलक आ कहलक माधबी अइ अइ धरम संकट से तू ही मुक्त करा सकै छे। मृनालिनी अपना कोठरी में सुते चल गेल।माधबी बहुत देर तक जग ले सोचैत रहे कि हमरे बाबू जी के जनमल मनोज हए।वो हमर जैविक भाई हए। हमरा दूनू में बिआह न हो सकै हए। हम दुनू भाई-बहन छी। सबेरे मनोज भैया से मिलब।इ सोचते सोचते निन पर गेल।
मनोज अपना माय रनिया के अपना आ माधबी के प्रेम के बारे में बतैलक आ बिआह करे के बारे में कहलक। रनिया कहलक-मनोज तोहर आ माधबी के विआह न हो सकै छैय।माधबी हमर जनमल न हए लेकिन माधबी के बाबू जी भी तोहर बाबू जी हौअ।बौआ मनोज इ एगो धरम संकट हए। आइ तोरे मुक्त करे के हौआ।
मनोज कहलक माय इ बात हम जनैय छी के हम माधबी के जैविक भाई छियै। लेकिन हमरा मन में समाज के उपेक्षा आ ताना रखैल पुत्र कहला से हमरा मन में बदला लेबे के भाव आ गेल रहल हए। समाज हमरा आ माधबी के भाइ-बहिन न मानै हए ।हमरा बड़ा मानसिक पीड़ा भेल हए ।आब इतना त हम जनैय छी कि अगरा जात के नारी, दलित जात के रखैल के प्रेमिका कहै हए। आ दलित जात के नारी, अगरा जात के प्रेमिका के रखैल कहे हए। इ मापदंड समाज में ब्यापत हए ।जबकि लिव इन रिलेशनशिप अतीत काल से चल रहल हए। वर्तमान समय में एकर चलन और बढ गेल हए।लेकिन तोरा कहला पर हमरा मन के बदला के भाव मिट गेल। हमरा मन से अगरा आ दलित के भाव मिट गेल।आबि हमरा मन में भाई-बहन के प्रेम जाग गेल।हम माधबी के जैविक भाई छियै आ माधबी हमर बहिन।
सबरे कौआ के कांव कांव से माधबी के निन टुटल। मनोज के रनिया उठैलक। सबेरे छह बजे टहलैत बेर जब मनोज आ माधबी मिलल त भाई-बहन के रूप में मिलल।माधबी कहलक-भैया मनोज।मनोहर कहलक-बहिन माधबी।आ दुनू भाई-बहिन आपस में गला मिल गेल।
आइ राजेश्वर प्रताप, मृनालिनी ,माधबी, रनिया आ मनोज धरम संकट से मुक्त हो गेल।
-आचार्य रामानंद मंडल सामाजिक चिंतक सीतामढ़ी,सेवानिवृत्त प्रधानाध्यापक, माता-चन्द्र देवी, पिता-स्व०राजेश्वर मंडल, पत्नी-प्रमिला देवी, जन्म तिथि-०१ जनवरी १९६० योग्यता- एम-एससी (रसायन शास्त्र), एम ए (हिन्दी)। रूचि- साहित्यिक, मैथिली-हिन्दी कविता -कहानी लेखन आ आलेख। प्रकाशित पोथी - मैथिली कविता संग्रह भासा के न बांटियो। २०२२ प्रकाशित रचना - सझिया कविता संग्रह पोथी - जनक नंदिनी जानकी आ शौर्य गान। २०२२ पत्रिका -मिथिला समाज, घर -बाहर आ अपूर्वा (मैसाम)। अखबार -दैनिक मैथिल पुनर्जागरण प्रकाश। सामाजिक-सामाजिक चिंतन, दायित्व- पूर्व जिला प्रतिनिधि, प्राथमिक शिक्षक संघ, डुमरा, सीतामढ़ी। स्थायी पत्ता- ग्राम-पिपरा विशनपुर थाना-परिहार जिला-सीतामढी। वर्तमान पता-पिपरा सदन,मुरलियाचक वार्ड-04 सीतामढ़ी पोस्ट-चकमहिला जिला-सीतामढी राज्य-बिहार पिन-843302 मो नं-9973641075 ईमेल-ramanandmandal001@gmail.com
ऐ रचनापर अपन मंतव्य editorial.staff.videha@gmail.com पर पठाउ।